Aranya Kanda, Sarga 51

इत्युक्तस्य यथान्यायं रावणस्य जटायुषा। क्रुद्धस्याग्निनिभास्सर्वा रेजुर्विंशतिदृष्टयः।।3.51.1।।

ityuktasya yathānyāyaṃ rāvaṇasya jaṭāyuṣā| kruddhasyāgninibhāssarvā rejurviṃśatidṛṣṭayaḥ

Ravana's twenty eyes glowed like fire in anger after Jatayu thus rightly said.

संरक्तनयनः कोपात्तप्तकाञ्चनकुण्डलः। राक्षसेन्द्रोऽभिदुद्राव पतगेन्द्रममर्षणः।।3.51.2।।

saṃraktanayanaḥ kopāttaptakāñcanakuṇḍalaḥ| rākṣasendro'bhidudrāva patagendramamarṣaṇaḥ

As the bright gold earrings of the intolerant king of demons glittered, his eyes turned red in rage and he pounced upon Jatayu, the lord of birds.

स सम्प्रहारस्तुमुल स्तयोस्तस्मिन्महावने। बभूव वातोद्धतयोर्मेघयोर्गगने यथा।।3.51.3।।

sa samprahārastumula stayostasminmahāvane| babhūva vātoddhatayormeghayorgagane yathā

The clash between them was tumultuous and it appeared like the clash of two pieces of clouds in the sky raised by stormy winds.

तद्बभूवाद्भुतं युद्धं गृध्रराक्षसयोस्तदा। सपक्षयोर्माल्यवतोर्महापर्वतयोरिव।।3.51.4।।

tadbabhūvādbhutaṃ yuddhaṃ gṛdhrarākṣasayostadā| sapakṣayormālyavatormahāparvatayoriva

The duel between Ravana and Jatayu looked as though it was a fight between two huge winged mountains of Malyavan range.

ततो नालीकनाराचैस्तीक्ष्णाग्रैश्च विकर्णिभिः। अभ्यवर्षन्महाघोरैर्गृध्रराजं महाबलः।।3.51.5।।

tato nālīkanārācaistīkṣṇāgraiśca vikarṇibhiḥ| abhyavarṣanmahāghorairgṛdhrarājaṃ mahābalaḥ

Then the mighty Ravana rained sharp, dreadful shafts, spears and Vikarnis at Jatayu, king of vultures.

स तानि शरजालानि गृध्रः पत्त्ररथेश्वरः। जटायुः प्रतिजग्राह रावणास्त्राणि संयुगे।।3.51.6।।

sa tāni śarajālāni gṛdhraḥ pattraratheśvaraḥ| jaṭāyuḥ pratijagrāha rāvaṇāstrāṇi saṃyuge

Jatayu, lord of the birds, faced the arrows and other weapons showered by Ravana.

तस्य तीक्ष्णनखाभ्यां तु चरणाभ्यां महाबलः। चकार बहुधा गात्रे व्रणान्पतगसत्तमः।।3.51.7।।

tasya tīkṣṇanakhābhyāṃ tu caraṇābhyāṃ mahābalaḥ| cakāra bahudhā gātre vraṇānpatagasattamaḥ

The mighty, virtuous vulture with his sharp claws wounded many parts of the body of Ravana.

अथ क्रोधाद्धशग्रीवो जग्राह दश मार्गणान्। मृत्युदण्डनिभान्घोरान्छत्रुमर्दनकाङ्क्षया।।3.51.8।।

atha krodhāddhaśagrīvo jagrāha daśa mārgaṇān| mṛtyudaṇḍanibhānghorānchatrumardanakāṅkṣayā

Ravana in a rage took ten dreadful darts (looking) like the staff of death with a desire to crush the enemy.

स तैर्बाणैर्महावीर्यः पूर्णमुक्तैरजिह्मगैः। बिभेद निशितैस्तीक्ष्णैर्गृध्रं घोरैश्शिलीमुखैः।।3.51.9।।

sa tairbāṇairmahāvīryaḥ pūrṇamuktairajihmagaiḥ| bibheda niśitaistīkṣṇairgṛdhraṃ ghoraiśśilīmukhaiḥ

The mighty Ravana fully released his dreadful, sharp arrows that went straight and pierced the vulture.

स राक्षसरथे पश्यन्जानकीं बाष्पलोचनाम्। अचिन्तयित्वा तान्बाणान्राक्षसं समभिद्रवत्।।3.51.10।।

sa rākṣasarathe paśyanjānakīṃ bāṣpalocanām| acintayitvā tānbāṇānrākṣasaṃ samabhidravat

Seeing Sita, daughter of Janaka, on the demon's chariot with eyes full of tears, Jatayu without minding the arrows renewed his attack.

ततोऽस्य सशरं चापं मुक्तामणिविभूषितम्। चरणाभ्यां महातेजा बभञ्ज पतगेश्वरः।।3.51.11।।

tato'sya saśaraṃ cāpaṃ muktāmaṇivibhūṣitam| caraṇābhyāṃ mahātejā babhañja patageśvaraḥ

The glorious lord of birds crushed with his feet the bow and arrow of Ravana with pearls and gems encrusted.

ततोऽन्यद्धनुरादाय रावणः क्रोधमूर्छितः। ववर्ष शरवर्षाणि शतशोऽथ सहस्रशः।।3.51.12।।

tato'nyaddhanurādāya rāvaṇaḥ krodhamūrchitaḥ| vavarṣa śaravarṣāṇi śataśo'tha sahasraśaḥ

Overcome with anger, Ravana took another bow and rained (on him) hundreds and thousands of arrows.

शरैरावारितस्तस्य संयुगे पतगेश्वरः। कुलायमुपसम्प्राप्तः पक्षीव प्रबभौ तदा।।3.51.13।।

śarairāvāritastasya saṃyuge patageśvaraḥ| kulāyamupasamprāptaḥ pakṣīva prababhau tadā

Jatayu, shot with arrows on all sides in the combat, shone like the bird that returned to its nest.

स तानि शरवर्षाणि पक्षाभ्यां च विधूयच। चरणाभ्यां महातेजा बभञ्जास्य महद्धनुः।।3.51.14।।

sa tāni śaravarṣāṇi pakṣābhyāṃ ca vidhūyaca| caraṇābhyāṃ mahātejā babhañjāsya mahaddhanuḥ

Powerful Jatayu scattered the shower of arrows with his wings and broke down the great bow with his claws.

तच्चाग्निसदृशं दीप्तं रावणस्य शरावरम्। पक्षाभ्यां स महावीर्यो व्याधुनोत्पतगेश्वरः।।3.51.15।।

taccāgnisadṛśaṃ dīptaṃ rāvaṇasya śarāvaram| pakṣābhyāṃ sa mahāvīryo vyādhunotpatageśvaraḥ

Mighty Jatayu, lord of the birds, shattered with his wings the armour of Ravana that was glowing like fire.

काञ्चनोरश्छदान्दिव्यान्पिशाचवदनान्खरान्। तांश्चास्य जवसम्पन्नाञ्जघान समरे बली।।3.51.16।।

kāñcanoraśchadāndivyānpiśācavadanānkharān| tāṃścāsya javasampannāñjaghāna samare balī

Powerful Jatayu killed in the combat, the splendid, swiftmoving, devilfaced asses with golden shields yoked to the chariot.

वरं त्रिवेणुसम्पन्नं कामगं पावकार्चिषम्। मणिहेमविचित्राङ्गं बभञ्ज च महारथम्।।3.51.17।।

varaṃ triveṇusampannaṃ kāmagaṃ pāvakārciṣam| maṇihemavicitrāṅgaṃ babhañja ca mahāratham

Then he(Jatayu) broke down the great chariot(of Ravana) glowing like fire, glittering with gold and gems, made of three bamboo reeds, and capable of flying wherever the rider willed.

पूर्णचन्द्रप्रतीकाशं छत्रं च व्यजनैस्सह। पातयामास वेगेन ग्राहिभी राक्षसैस्सह।।3.51.18।।

pūrṇacandrapratīkāśaṃ chatraṃ ca vyajanaissaha| pātayāmāsa vegena grāhibhī rākṣasaissaha

Jatayu violently pulled down the parasol shining like the full moon and the fans of the chariot along with the demons holding them.

सारथेश्चास्य वेगेन तुण्डेनैव महच्छिरः। पुनर्व्यपाहरच्छ्रीमान्पक्षिराजो महाबलः।।3.51.19।।

sāratheścāsya vegena tuṇḍenaiva mahacchiraḥ| punarvyapāharacchrīmānpakṣirājo mahābalaḥ

Again the glorious, powerful king of birds swiftly shattered the huge head of the charioteer with his beak.

स भग्नधन्वा विरथो हताश्वो हतसारथिः। अङ्केनादाय वैदेहीं पपात भुवि रावणः।।3.51.20।।

sa bhagnadhanvā viratho hatāśvo hatasārathiḥ| aṅkenādāya vaidehīṃ papāta bhuvi rāvaṇaḥ

With the bow broken, the chariot destroyed, asses (drawing the chariot) and the charioteer dead, Ravana fell down on the ground holding Vaidehi on his lap.

दृष्ट्वा निपतितं भूमौ रावणं भग्नवाहनम्। साधुसाध्विति भूतानि गृध्रराजमपूजयन्।।3.51.21।।

dṛṣṭvā nipatitaṃ bhūmau rāvaṇaṃ bhagnavāhanam| sādhusādhviti bhūtāni gṛdhrarājamapūjayan

Seeing Ravana fallen on the ground with his broken chariot, all beings honoured the king of the birds, saying, Well done Well done

परिश्रान्तं तु तं दृष्टवा जरया पक्षियूथपम्। उत्पपात पुनर्हृष्टो मैथिलीं गृह्य रावणः।।3.51.22।।

pariśrāntaṃ tu taṃ dṛṣṭavā jarayā pakṣiyūthapam| utpapāta punarhṛṣṭo maithilīṃ gṛhya rāvaṇaḥ

Seeing the lord of the flocks of birds exhausted due to age still fighting, Ravana felt glad. He flew back into the sky taking Sita, princess of Mithila, with him.

तं प्रहृष्टं निधायाङ्के गच्छन्तं जनकात्मजाम्। गृध्रराजस्समुत्पत्य समभिद्रुत्य रावणम्।।3.51.23।। समावार्य महातेजा जटायुरिदमब्रवीत्।

taṃ prahṛṣṭaṃ nidhāyāṅke gacchantaṃ janakātmajām| gṛdhrarājassamutpatya samabhidrutya rāvaṇam samāvārya mahātejā jaṭāyuridamabravīt|

Seeing Sita, Janaka's daughter, happily carried away into the sky by Ravana on his lap. Jatayu, the mighty king of vultures chased him, and obstructing his path said :

वज्रसंस्पर्शबाणस्य भार्यां रामस्य रावण।।3.51.24।। अल्पबुद्धे हरस्येनां वधाय खलु रक्षसाम्।

vajrasaṃsparśabāṇasya bhāryāṃ rāmasya rāvaṇa alpabuddhe harasyenāṃ vadhāya khalu rakṣasām|

Foolish Ravana, you are kidnapping this lady, wife of Rama, whose arrows can hit like a thunderbolt. This will lead to the destruction of all demons.

समित्रबन्धुस्सामात्यस्सबलस्सपरिच्छदः।।3.51.25।। विषपानं पिबस्येतत्पिपासित इवोदकम्।

samitrabandhussāmātyassabalassaparicchadaḥ viṣapānaṃ pibasyetatpipāsita ivodakam|

You are drinking poison along with all your friends, relatives, ministers, the army and your allies. like a thirsty man drinks water.

अनुबन्धमजानन्तः कर्मणामविचक्षणाः।।3.51.26।। शीघ्रमेव विनश्यन्ति यथा त्वं विनशिष्यसि।

anubandhamajānantaḥ karmaṇāmavicakṣaṇāḥ śīghrameva vinaśyanti yathā tvaṃ vinaśiṣyasi|

Fools who do not know the consequences of their action perish soon. Similarly you are going to die soon.

बद्धस्त्वं कालपाशेन क्व गतस्तस्य मोक्ष्यसे।।3.51.27।। वधाय बडिशं गृह्य सामिषं जलजो यथा।

baddhastvaṃ kālapāśena kva gatastasya mokṣyase vadhāya baḍiśaṃ gṛhya sāmiṣaṃ jalajo yathā|

You are bound by the noose of death like a fish holding on to the bait of the fishing hook. Where can you go now?

न हि जातु दुराधर्षौ काकुत्स्थौ तव रावण।।3.51.28।। धर्षणं चाश्रमस्यास्य क्षमिष्येते तु राघवौ।

na hi jātu durādharṣau kākutsthau tava rāvaṇa dharṣaṇaṃ cāśramasyāsya kṣamiṣyete tu rāghavau|

O Ravana know that Rama and Lakshmana, the Kakutsthas, are invincible. They will not forgive the asssault you have made on their hermitage.

यथा त्वया कृतं कर्म भीरुणा लोकगर्हितम्।।3.51.29।। तस्कराचरितो मार्गो नैव वीरनिषेवितः।

yathā tvayā kṛtaṃ karma bhīruṇā lokagarhitam taskarācarito mārgo naiva vīraniṣevitaḥ|

Your cowardly action will be condemned by the whole world. The path you have chosen is the path of a thief and not of a hero.

युध्यस्व यदि शूरोऽसि मुहूर्तं तिष्ठरावण।।3.51.30।। शयिष्यसे हतो भूमौ यथा भ्राता खरस्तथा।

yudhyasva yadi śūro'si muhūrtaṃ tiṣṭharāvaṇa śayiṣyase hato bhūmau yathā bhrātā kharastathā|

O Ravana if you are courageous, tarry awhile and fight with me. Like your brother Khara, you will lie on the ground dead.

परेतकाले पुरुषो यत्कर्म प्रतिपद्यते।।3.51.31।। विनाशायात्मनोऽधर्म्यं प्रतिपन्नोऽसि कर्म तत्।

paretakāle puruṣo yatkarma pratipadyate vināśāyātmano'dharmyaṃ pratipanno'si karma tat|

You have resorted to unrighteous action like a dying man. This will spell your destruction.

पापानुबन्धो वै यस्य कर्मणः कर्मको नु तत्।।3.51.32।। कुर्वीत लोकाधिपतिस्स्वयंभूर्भगवानपि।

pāpānubandho vai yasya karmaṇaḥ karmako nu tat kurvīta lokādhipatissvayaṃbhūrbhagavānapi|

If the consequences of an action be sin, who will do it ? Even the selfborn lord of the world may not.

एवमुक्त्वा शुभं वाक्यं जटायुस्तस्य रक्षसः।।3.51.33।। निपपात भृशं पृष्ठे दशग्रीवस्य वीर्यवान्।

evamuktvā śubhaṃ vākyaṃ jaṭāyustasya rakṣasaḥ nipapāta bhṛśaṃ pṛṣṭhe daśagrīvasya vīryavān|

Brave Jatayu having thus said these cautious words to the demon dashed against his back again and again.

तं गृहीत्वा नखैस्तीक्ष्णैर्विददार समन्ततः।।3.51.34।। अधिरूढो गजारोहो यथा स्याद्दुष्टवारणम्।

taṃ gṛhītvā nakhaistīkṣṇairvidadāra samantataḥ adhirūḍho gajāroho yathā syādduṣṭavāraṇam|

Thereafter, seizing Ravana, Jatayu ascended on his back and pierced his body all over with his sharp claws just as a rider goads an unruly elephant.

विददार नखैरस्य तुण्डं पृष्ठे समर्पयन्।।3.51.35।। केशांश्चोत्पाटयामास नखपक्षमुखायुधः।

vidadāra nakhairasya tuṇḍaṃ pṛṣṭhe samarpayan keśāṃścotpāṭayāmāsa nakhapakṣamukhāyudhaḥ|

Jatayu who had his claws, wings and beak as the only weapons pierced and pricked Ravana all over with his nails by pressing his beak on his back and pulled out his hair.

स तथा गृध्रराजेन क्लिश्यमानो मुहुर्मुहुः।।3.51.36।। अमर्षस्फुरितोष्ठस्सन्प्राकम्पत च रावणः।

sa tathā gṛdhrarājena kliśyamāno muhurmuhuḥ amarṣasphuritoṣṭhassanprākampata ca rāvaṇaḥ|

Thus tormented again and again by the king of vultures, Ravana shook with anger, his lips quivering.

स परिष्वज्य च वैदेहीं वामेनाङ्केन रावणः।।3.51.37।। तलेनाभिजघानाशु जटायुं क्रोधमुर्छीतः।

sa pariṣvajya ca vaidehīṃ vāmenāṅkena rāvaṇaḥ talenābhijaghānāśu jaṭāyuṃ krodhamurchītaḥ|

Losing his senses, with rage, Ravana held Vaidehi (Sita) with his left arm and hit Jatayu with his palm.

जटायुस्तमभिक्रम्य तुण्डेनास्य खगाधिपः।।3.51.38।। वामबाहून्दश तदा व्यपाहरदरिन्दमः।

jaṭāyustamabhikramya tuṇḍenāsya khagādhipaḥ vāmabāhūndaśa tadā vyapāharadarindamaḥ|

Then Jatayu, lord of the birds, subduer of enemies, overpowered Ravana and dismembered his ten left arms with his beak.

सञ्छिन्नबाहोस्सद्यैव बाहवस्सहसाभवन्।।3.51.39।। विषज्वालावलीयुक्ता वल्मीकादिव पन्नगाः।

sañchinnabāhossadyaiva bāhavassahasābhavan viṣajvālāvalīyuktā valmīkādiva pannagāḥ|

As the left arms were cut off, there came out from them all the ten arms instantaneously like serpents emitting poisonous flames from anthills

ततः क्रोधाद्दशग्रीवस्सीतामुत्सृज्य रावणः।।3.51.40।। मुष्टिभ्यां चरणाभ्यां च गृध्रराजमपोथयत्।

tataḥ krodhāddaśagrīvassītāmutsṛjya rāvaṇaḥ muṣṭibhyāṃ caraṇābhyāṃ ca gṛdhrarājamapothayat|

Then the tenheaded Ravana left Sita and attacked Jatayu with his fists and feet out of anger.

ततो मुहूर्तं सङ्ग्रामो बभूवातुल्यवीर्ययोः।।3.51.41।। राक्षसानां च मुख्यस्य पक्षिणां प्रवरस्य च।

tato muhūrtaṃ saṅgrāmo babhūvātulyavīryayoḥ rākṣasānāṃ ca mukhyasya pakṣiṇāṃ pravarasya ca|

Between the warriors of unequal valour, Ravana and Jatayu, the chief of the demons and the foremost of the birds, the fight took place for a moment.

तस्य व्यायच्छमानस्य रामस्यार्थे स रावणः।।3.51.42।। पक्षौ पार्श्वौ च पादौ च खड्गमुद्धृत्य सोऽच्छिनत्।

tasya vyāyacchamānasya rāmasyārthe sa rāvaṇaḥ pakṣau pārśvau ca pādau ca khaḍgamuddhṛtya so'cchinat|

Ravana lifted his sword and cut off both the wings and feet of Jatayu who was fighting relentlessly (for Rama's sake).

स च्छिन्नपक्षस्सहसा रक्षसा रौद्रकर्मणा।।3.51.43।। निपपात हतो गृद्रो धरण्यामल्पजीवितः।

sa cchinnapakṣassahasā rakṣasā raudrakarmaṇā nipapāta hato gṛdro dharaṇyāmalpajīvitaḥ|

(Seriously) wounded and almost dead,the vulture fell down on the ground all at once, when his wings were chipped by the demon of terrible deeds.

तं दृष्ट्वा पतितं भूमौ क्षतजार्द्रं जटायुषम्।।3.51.44।। अभ्यधावत वैदेही स्वबन्धुमिव दुःखिता।

taṃ dṛṣṭvā patitaṃ bhūmau kṣatajārdraṃ jaṭāyuṣam abhyadhāvata vaidehī svabandhumiva duḥkhitā|

Sita, princess of Videha, saw the wounded Jatayu fallen on the ground drenched in blood. Grieving, she ran towards him as if he was her relative.

तं नीलजीमूतनिकाशकल्पं सुपाण्डुरोरस्कमुदारवीर्यम्। ददर्श लङ्काधिपतिः पृथिव्यां जटायुषं शान्तमिवाग्निदावम्।।3.51.45।।

taṃ nīlajīmūtanikāśakalpaṃ supāṇḍuroraskamudāravīryam| dadarśa laṅkādhipatiḥ pṛthivyāṃ jaṭāyuṣaṃ śāntamivāgnidāvam

Lord of Lanka saw that very bold Jatayu of dark blue colour of the cloud, fair chest, fallen on the ground, looking like the forest fire that had been put out.

ततस्तु तं पत्ररथं महीतले निपातितं रावणवेगमर्दितम्। पुनः परिश्वज्य शशिप्रभानना रुरोद सीता जनकात्मजातदा।।3.51.46।।

tatastu taṃ patrarathaṃ mahītale nipātitaṃ rāvaṇavegamarditam| punaḥ pariśvajya śaśiprabhānanā ruroda sītā janakātmajātadā

Sita, daughter of Janaka, whose face was radiant like the Moon once again embraced Jatayu, the winged warrior, fallen on the ground, crushed by Ravana's onslaught and wept. इतयार्षे श्रीमद्रामायणे वाल्मीकीय आदिकाव्ये अरण्यकाण्डे एकपञ्चाशस्सर्गः।। Thus ends the fiftyfirst sarga of Aranyakanda of the holy Ramayana the first epic composed by sage Valmiki.